ٹینکر سے کچلی گئی زینب کا کیس نئی طاقت کا باعث بن سکتا ہے:گورنر سندھ

کراچی( اباسین خبر) گورنر سندھ کامران ٹیسوری نے ملیر کراچی میں میڈیا سے بات کرتے ہوئے کہا کہ ایک بشری زیدی کیس نے ایم کیو ایم کی بنیاد رکھی تھی اور ٹینکر سے کچلی گئی زینب کا کیس نئی طاقت کو جنم دے سکتا ہے۔انہوں نے ٹینکر سے کچلے گئے خاندان سے اظہار تعزیت کرتے ہوئے کہا کہ اگر مجھے ہٹا سکتے ہو تو ہٹا دو، مگر عوام کے مسائل کے بارے میں بولنا کبھی نہیں چھوڑوں گا۔ کامران ٹیسوری نے مزید کہا کہ جتنے لوگ ڈمپر تلے کچلے گئے ہیں، ان کے لواحقین کو عید کے بعد ایک ایک پلاٹ دیا جائے گا۔گورنر سندھ کا کہنا تھا کہ یوسی کے ذمہ دار چاہے کسی بھی جماعت سے ہوں، میرے پاس ٹوٹی سڑکوں کی لسٹ لائیں، میں اپنے پیسوں سے سڑکیں بنواوں گا۔ انہوں نے چیف جسٹس سے درخواست کی کہ ڈمپر، ٹینکر اور ہیوی ٹریفک کے ذریعے ہونے والی ہلاکتوں کا معاملہ دیکھیں اور اس پر فیصلہ سنائیں، اور اس سلسلے میں چیف جسٹس کو خط لکھنے کا اعلان بھی کیا۔اس سے قبل میئر کراچی مرتضی وہاب نے گورنر کامران ٹیسوری پر تنقید کرتے ہوئے کہا کہ شترمرغ کی کڑھائی کھلانے، آئی فون بانٹنے اور کھوکھلے وعدوں سے مسائل حل نہیں ہوں گے۔ انہوں نے مزید کہا کہ اگر گورنر صاحب واقعی کراچی کی بہتری چاہتے ہیں تو اپنی جماعت کی جانب سے کی گئی چائنا کٹنگ کی زمینیں واپس دلوا دیں۔