پاکستان اور آئی ایم ایف کے درمیان 1.3 ارب ڈالر قرض پر معاہدہ کامیاب

اسلام آباد( کامرس ڈیسک)پاکستان اور عالمی مالیاتی فنڈ (آئی ایم ایف) کے درمیان 1.3 ارب ڈالر قرض کے لیے مذاکرات کامیاب ہوگئے ہیں۔ آئی ایم ایف کی ٹیم کی قیادت نیتھن پورٹر نے کی، اور اسٹاف لیول معاہدہ طے پایا ہے جس کے تحت پاکستان کو ایک ارب ڈالر تک رسائی حاصل ہوگی۔آئی ایم ایف حکام کے مطابق پاکستان نے اقتصادی چیلنجز کے باوجود میکرو اکنامک استحکام کی بحالی میں پیشرفت کی ہے، اور افراط زر 2015 کے بعد سے کم ترین سطح پر پہنچ چکا ہے۔ اس معاہدے کے بعد آئی ایم ایف پروگرام کے تحت پاکستان کے قرض کی مجموعی رقم 2 ارب ڈالر تک پہنچ جائے گی۔آئی ایم ایف کا کہنا ہے کہ پاکستان میں اقتصادی سرگرمیاں بتدریج بڑھنے کا امکان ہے، حالانکہ ملک کو ماحولیاتی خطرات کا سامنا ہے۔ معاہدے کی حتمی منظوری آئی ایم ایف کے بورڈ سے حاصل کی جائے گی۔