میں کسی رنگ برنگے یوٹیوبرز کو نہیں جانتی، عظمی بخاری کا رجب بٹ معاملے پر لاعلمی کا اظہار

لاہور( اباسین خبر)وزیرِ اطلاعات پنجاب عظمی بخاری نے یوٹیوبر رجب بٹ کے معاملے پر لاعلمی کا اظہار کرتے ہوئے کہا ہے کہ وہ رنگ برنگے یوٹیوبرز کو نہیں جانتی۔ پریس کانفرنس کے دوران صحافی کے سوال کا جواب دیتے ہوئے عظمی بخاری نے کہا کہ انہیں یہ نہیں معلوم کہ رجب بٹ ملک میں ہیں یا ملک چھوڑ چکے ہیں، حکومت کا اس سے کوئی تعلق نہیں ہے۔انہوں نے مزید کہا کہ رجب بٹ کے خلاف ایف آئی آر درج ہو چکی ہے، اور اب قانون اپنا راستہ اختیار کرے گا۔عظمی بخاری نے سوشل میڈیا انفلوئنسرز پر تنقید کرتے ہوئے کہا کہ وہ ایسے یوٹیوبرز کو فالو نہیں کرتیں لیکن ہمیشہ اس قسم کے مواد کے خلاف آواز اٹھاتی ہیں جو ہمارے معاشرتی اور اخلاقی اقدار کے خلاف ہو۔واضح رہے کہ رجب بٹ کے خلاف پیکا ایکٹ کے تحت ایک اور مقدمہ درج کیا گیا ہے، جس میں جذبات مجروح کرنے کی دفعات شامل ہیں۔ اس ایف آئی آر میں رجب بٹ کی جانب سے نیا پرفیوم متعارف کرانے کا بھی ذکر کیا گیا ہے۔