اسلامی نظریاتی کونسل نے سپریم کورٹ کا فیصلہ غیر اسلامی قرار دے دیا

اسلام آباد( اباسین خبر)اسلامی نظریاتی کونسل نے بغیر اجازت دوسری شادی کرنے پر پہلی بیوی کو فسخ نکاح کا حق دینے کے عدالتی فیصلے کو غیر اسلامی قرار دے دیا ہے۔ کونسل کے اجلاس کی صدارت چیئرمین راغب حسین نعیمی نے کی، جس میں اس مسئلے پر تفصیلی بحث کی گئی۔اسلامی نظریاتی کونسل کا کہنا تھا کہ ایسا عدالتی فیصلہ جو پہلی بیوی کو یہ حق دے، شریعت کے اصولوں کے مطابق نہیں ہے۔ کونسل نے یہ بھی وضاحت دی کہ نکاح سے پہلے تھیلیسمیا یا دیگر متعدی بیماریوں کو بطور اختیاری نکاح نامہ میں شامل کیا جا سکتا ہے تاکہ دونوں فریقین کو مکمل آگاہی حاصل ہو۔مزید برآں، کونسل نے انسانی اعضا کی پیوندکاری کے حوالے سے بھی اپنا موقف پیش کیا اور کہا کہ یہ عمل زندگی کو خطرے میں ڈالے بغیر کیا جا سکتا ہے۔یاد رہے کہ سپریم کورٹ نے بغیر اجازت دوسری شادی کرنے پر پہلی بیوی کو معاہدہ فسخ کرنے کا حق دینے کا فیصلہ سنایا تھا۔ اسلامی نظریاتی کونسل نے اس فیصلے کو اسلامی تعلیمات سے ہم آہنگ نہ ہونے کے طور پر مسترد کر دیا۔اجلاس کے دوران انسانی دودھ کے بینک کے قیام سے متعلق ایک اور اہم معاملہ بھی زیر بحث آیا، جس پر حتمی فیصلہ اگلے اجلاس میں کیا جائے گا۔