تشدد کے بعداسرائیلی فوج نے آسکر ایوارڈ یافتہ فلسطینی ہدایت کار حمدان بلال کو رہا کر دیا

تل ابیب ( مانیٹرنگ ڈیسک)اسرائیلی فوج نے آسکر ایوارڈ یافتہ دستاویزی فلم “نو ادر لینڈ” کے فلسطینی شریک ہدایت کار حمدان بلال کو رہا کر دیا۔ حمدان بلال کو مقبوضہ مغربی کنارے میں ایک اسرائیلی بستی کریات اربعہ کے تھانے میں رکھا گیا تھا، جہاں انہیں شدید تشدد کا نشانہ بنایا گیا۔فلم “نو ادر لینڈ” کے فلسطینی شریک ہدایت کار کے بھائی نیمر بلال نے بتایا کہ حمدان بلال کو رہائی کے بعد اسپتال منتقل کیا گیا، جہاں وہ زیرِ علاج رہنے کے بعد گھر واپس آ گئے ہیں۔اس واقعے کے بعد فلم کے شریک اسرائیلی ڈائریکٹر یوول ابراہم نے سماجی رابطے کی ویب سائٹ ایکس پر ایک پوسٹ شیئر کی، جس میں انہوں نے اطلاع دی کہ اسرائیلی آبادکاروں کے ایک گروہ نے حمدان بلال کو شدید تشدد کا نشانہ بنایا تھا۔ اس تشدد کے نتیجے میں ان کے سر اور پیٹ میں چوٹیں آئی ہیں، اور اسرائیلی فورسز نے ایمبولینس پر حملہ کر کے انہیں گرفتار کر لیا تھا۔