اسلام آباد ہائیکورٹ میں لاپتہ صحافی وحید مراد کی بازیابی کے لیے درخواست دائر

اسلام آباد( اباسین خبر) اسلام آباد سے لاپتہ صحافی وحید مراد کی بازیابی کے لیے اسلام آباد ہائیکورٹ میں درخواست دائر کر دی گئی ہے۔ درخواست صحافی وحید مراد کی ساس عابدہ نواز کی جانب سے دائر کی گئی ہے، جس میں سیکرٹری داخلہ، سیکرٹری دفاع، آئی جی اور ایس ایچ او کراچی کمپنی کو فریق بنایا گیا ہے۔درخواست میں موقف اختیار کیا گیا ہے کہ رات دو بجے کالی وردی میں ملبوس افراد جی ایٹ میں واقع وحید مراد کے گھر آئے، اور ان کے ساتھ دو پولیس کی گاڑیاں بھی تھیں۔ یہ افراد وحید مراد کو زبردستی اٹھا کر لے گئے، اور اہل خانہ سے بدتمیزی بھی کی۔ درخواست گزار نے مزید بتایا کہ واقعہ کے بعد کراچی کمپنی تھانے میں درخواست دی گئی لیکن مقدمہ درج نہیں کیا گیا۔عابدہ نواز نے درخواست میں استدعا کی ہے کہ عدالت وحید مراد کو فوری طور پر بازیاب کرانے کا حکم دے اور غیر قانونی طور پر اٹھانے والوں کے خلاف کارروائی کا حکم بھی دے۔