پاکستانی کوہ پیما شہروز کاشف کا ایوارڈ نہ ملنے پر سخت ناراض، 4 گنیز ورلڈ ریکارڈز بنانے کا فخر

اسلام آباد( سپورٹس ڈیسک)پاکستانی کوہ پیما شہروز کاشف نے حکومت کی جانب سے سول ایوارڈ نہ ملنے پر اپنی ناراضگی کا اظہار کیا ہے۔ سوشل میڈیا پر سول ایوارڈ اور پاکستان ڈے کے ہیش ٹیگ کے ساتھ اپنے پیغام میں شہروز کاشف نے کہا کہ انہیں 4 گنیز ورلڈ ریکارڈ بنانے پر فخر ہے اور وہ 22 برس کی عمر میں 8 ہزار میٹر سے بلند تمام 14 چوٹیاں سر کر چکے ہیں۔شہروز کاشف نے مزید کہا کہ وہ 8 ہزار میٹر سے بلند تمام 14 چوٹیاں سر کرنے والے کم عمر ترین پاکستانی ہیں، اور وہ گزشتہ 4 سال سے قومی سول ایوارڈ کے منتظر ہیں، لیکن ہر بار آخری لمحوں میں ان کا نام نکال دیا جاتا ہے۔ انہوں نے کہا کہ ان کا جذبہ ماند پڑ چکا ہے، تاہم ان کا عزم ابھی بھی پختہ ہے۔ 23 مارچ کے موقع پر ایوارڈز حاصل کرنے والوں کو انہوں نے مبارک باد دی۔