23 مارچ ہمیں قیام پاکستان کے سنہری اغراض و مقاصد کی یاد دلاتا ہے: مریم نواز

لاہور( اباسین خبر)وزیراعلی پنجاب مریم نواز نے یوم پاکستان کے موقع پر قوم کو مبارکباد دیتے ہوئے وطن عزیز کو ترقی یافتہ ممالک کی صف میں شامل کرنے کے لیے اپنی تمام تر صلاحیتیں بروئے کار لانے کا عہد کیا ہے۔اپنے پیغام میں مریم نواز نے بانیان پاکستان کی جدوجہد اور شہدا کی قربانیوں کو خراج تحسین پیش کرتے ہوئے کہا کہ “23 مارچ ہمیں قیام پاکستان کے سنہری اغراض و مقاصد کی یاد دلاتا ہے، اللہ تعالی کے فضل سے پاکستان قائم ہوا اور یہ تا قیامت شاد و آباد رہے گا۔” انہوں نے مزید کہا کہ “پاکستان کو اللہ تعالی نے دنیائے اسلام کی پہلی ایٹمی طاقت بننے کا منفرد اعزاز بھی عطا کیا۔”مریم نواز نے کہا کہ یوم پاکستان ہمیں حصول پاکستان کی جدوجہد کے آغاز کی یاد دلاتا ہے اور اس دن کے موقع پر ہمیں پاک سرزمین کے تقدس اور حفاظت کے تقاضوں کا اعادہ کرنا چاہیے۔ انہوں نے اتحاد، ایمان اور نظم و ضبط کے سنہری اصولوں کو دہراتے ہوئے کہا کہ “پاکستان ہم سب کے لیے اللہ کی عطا کردہ نعمت ہے۔”وزیراعلی پنجاب نے مزید کہا کہ یوم پاکستان پر غربت میں کمی، عدم مساوات اور معاشرے کے کمزور طبقات کے تحفظ کا عہد کرتے ہیں۔ “ہم عہد کرتے ہیں کہ پنجاب کو قائداعظم اور دیگر بانیان پاکستان کے ویژن کے مطابق بلندیوں پر لے جائیں گے۔” انہوں نے تعلیم، صحت اور زراعت میں جدت لانے کا عہد بھی کیا اور کہا کہ “پنجاب کو پاکستان کی معیشت کا انجن اور ترقی کا مرکز بنائیں گے۔”