پاکستان ترقی کی جانب گامزن ہے مگر ملک دشمن حالات خراب کررہے ہیں:گورنر سندھ کامران ٹیسوری

کراچی( اباسین خبر) گورنر سندھ کامران خان ٹیسوری نے کہا ہے کہ پاکستان ترقی کی جانب گامزن ہے اور حکومت اور اس کے اتحادی ملک کی ترقی کے لیے رات دن کام کر رہے ہیں، تاہم دشمن طاقتیں حالات کو خراب کرنا چاہتی ہیں۔سحری کے دوران پی آئی بی کالونی میں عوام کے درمیان گفتگو کرتے ہوئے گورنر سندھ نے کہا کہ “ہم نے ایک کروڑ نوکریاں اور 50 لاکھ گھر بنانے کا وعدہ نہیں کیا تھا، لیکن ہم گورنر ہاس میں 50 ہزار طلبا کو آئی ٹی کورسز کروا رہے ہیں۔” اس موقع پر ایم کیو ایم کے رہنما ڈاکٹر فاروق ستار، پارٹی کارکنان اور عوام بڑی تعداد میں موجود تھے۔کامران ٹیسوری نے کہا کہ “دشمن طاقتیں حالات خراب کرنا چاہتی ہیں کیونکہ انہیں یہ علم ہے کہ اگر اس شہر کے لوگ اپنے پیروں پر کھڑے ہوگئے تو یہ ملک ترقی کرے گا۔” انہوں نے مزید کہا کہ انہوں نے اپنے بلوچ بھائیوں کو گورنر ہاس میں افطار پر مدعو کیا ہے۔گورنر سندھ کا کہنا تھا کہ “ہم اس شہر میں ترقیاتی کام کروائیں گے، سڑکیں اور گلیاں اعلی معیار کی ہوں گی اور گھروں میں پینے کے پانی اور گیس کی فراہمی یقینی بنائیں گے۔” انہوں نے یہ بھی کہا کہ “اس شہر میں منشیات اور گٹکے کی عادت بڑھتی جارہی ہے، ہمیں نوجوانوں کو آئی ٹی اور ہنر سکھا کر انہیں پیروں پر کھڑا کرنا ہے۔”کامران ٹیسوری نے مزید کہا کہ “سوشل میڈیا پر کوئی بھی معلومات بغیر تصدیق کے نہ پھیلائیں کیونکہ اس سے ملک اور افواج کو نقصان پہنچتا ہے۔” آخر میں گورنر سندھ نے وعدہ کیا کہ “ہم کراچی کو پھر سے روشنیوں کا شہر بنائیں گے۔