روس اور سعودی عرب یوکرین کی صورتحال حل کرنے کے لیے اقدامات پر متفق

ماسکو ( مانیٹرنگ ڈیسک) روس کے صدر ولادیمر پیوٹن اور سعودی عرب کے ولی عہد شہزادہ محمد بن سلمان کے درمیان ٹیلیفونک رابطہ ہوا ہے جس میں یوکرین کی صورتحال حل کرنے کے لیے اقدامات پر اتفاق کیا گیا۔روسی میڈیا کے مطابق سعودی ولی عہد نے روس اور امریکا کے تعلقات کو معمول پر لانے کے لیے اپنا کردار ادا کرنے پر آمادگی ظاہر کی جس پر صدر پیوٹن نے ریاض کی جانب سے ثالثی کی کوشش کو سراہا۔صدر پیوٹن نے اس بات کا اعادہ کیا کہ روس یوکرین کے ساتھ جنگ بندی پر تیار ہے، تاہم اس میں کچھ باریکیوں کا خیال رکھنا ہوگا۔ انہوں نے کہا کہ “یہ ابھی واضح نہیں کہ جنگ بندی کے احکامات کون دے گا اور اس کی قیمت کیا ادا کرنی ہوگی۔انہوں نے مزید کہا کہ “سوال یہ بھی ہے کہ کرسک کے علاقے میں موجود یوکرینی فوج ہتھیار ڈالے گی یا اس کی واپسی کیسے ہوگی۔