بہت ہو گئی،پاکستان کا افغان حکومت سے جعفر ایکسپریس حملے میں ملوث افراد کے خلاف کارروائی کا مطالبہ

اسلام آباد( ابا سین خبر)پاکستان نے افغان حکومت سے جعفر ایکسپریس حملے میں ملوث افراد کے خلاف کارروائی کا مطالبہ کیا ہے۔ہفتہ وار پریس بریفنگ میں ترجمان دفتر خارجہ شفقت علی خان نے کہا کہ جعفر ایکسپریس پر حملہ ملک سے باہر دہشت گردوں کا منصوبہ تھا۔ انہوں نے افغان حکومت پر زور دیا کہ وہ ذمہ داروں کے خلاف کارروائی کرے اور پاکستان کے ساتھ تعاون کرے۔شفقت علی خان نے بھارت کی جانب سے دو کشمیری تنظیموں کو غیر قانونی قرار دینے کی مذمت کرتے ہوئے کہا کہ بھارت کشمیری سیاسی جماعتوں پر عائد پابندیاں ہٹائے۔ بھارت نے عوامی ایکشن کمیٹی اور جموں و کشمیر اتحاد المسلمین کو پانچ سال کے لیے غیر قانونی ایسوسی ایشن قرار دیا ہے۔ترجمان دفتر خارجہ کا کہنا تھا کہ عوامی ایکشن کمیٹی کی قیادت میر واعظ عمر فاروق کررہے ہیں اور جموں و کشمیر اتحاد المسلمین کی بنیاد مولانا محمد عباس انصاری نے رکھی تھی۔ اس فیصلے سے کالعدم کشمیری تنظیموں کی تعداد 16 ہوگئی ہے۔امریکا کی جانب سے پاکستان پر سفری پابندیوں کے حوالے سے بات کرتے ہوئے شفقت علی خان نے کہا کہ یہ صرف قیاس آرائیاں ہیں اور امریکی حکام کے ساتھ رابطے میں ہیں، تاہم ابھی تک اس بارے میں کوئی تفصیلات فراہم نہیں کی گئیں۔انہوں نے اسرائیل کی جانب سے فلسطینیوں کے لیے امداد روکنے کے عمل کی مذمت کرتے ہوئے کہا کہ یہ اقدام امدادی تنظیموں کی سرگرمیوں کو روکنے کے لیے کیا گیا ہے اور عالمی برادری کو اسرائیلی مظالم کو روکنے میں اپنا کردار ادا کرنا چاہیے۔ترجمان نے مزید بتایا کہ وزیر خارجہ اسحاق ڈار نے او آئی سی کے وزرائے خارجہ کونسل کی میٹنگ میں شرکت کی اور فلسطینیوں کے لیے پاکستان کی مکمل حمایت کا اعادہ کیا۔ اسحاق ڈار نے سائیڈ لائنز پر فلسطینی وزیر اعظم اور دیگر کے ساتھ ملاقاتیں بھی کیں۔