قومی اسمبلی کے اجلاس میں جعفر ایکسپریس پر حملے کے خلاف متفقہ قرارداد منظور

اسلام آباد( اباسین خبر)قومی اسمبلی میں جعفر ایکسپریس پر حملے کے خلاف متفقہ قرارداد منظور کر لی گئی۔ وفاقی وزیر پارلیمانی امور طارق فضل چودھری نے یہ قرارداد پیش کی جسے ایوان میں متفقہ طور پر منظور کیا گیا۔قرارداد کے متن میں جعفر ایکسپریس واقعے اور دیگر تمام دہشت گردی کے واقعات کی شدید مذمت کی گئی۔ ایوان میں کہا گیا کہ قومی سلامتی کے دشمن نظریات کو پھیلنے کی اجازت نہیں دی جائے گی اور ملک کو عدم استحکام میں مبتلا کرنے والوں کے خلاف سخت کارروائی کی جائے گی۔قرارداد میں یہ بھی کہا گیا کہ ایوان حادثے میں جاں بحق ہونے والے معصوم شہریوں کے ساتھ اظہار یکجہتی کرتا ہے اور بہادر سکیورٹی فورسز کی ستائش کرتا ہے۔ ایوان نے دہشت گردی کے خلاف عوام کو بلا تفریق رنگ و نسل منظم ہونے کا اعادہ کیا۔