سلامتی کونسل نے جعفر ایکسپریس پر دہشت گرد حملے کی شدید مذمت، پاکستان سے عالمی تعاون کی اپیل

نیویارک( مانیٹرنگ ڈیسک) اقوام متحدہ کی سلامتی کونسل نے جعفر ایکسپریس پر ہونے والے بزدلانہ اور دہشت گرد حملے کی سخت ترین الفاظ میں مذمت کرتے ہوئے تمام ممالک پر زور دیا کہ وہ بین الاقوامی قانون اور سلامتی کونسل کی قراردادوں کے تحت پاکستان کے ساتھ بھرپور تعاون کریں۔سلامتی کونسل کے بیان میں کہا گیا کہ اراکین متاثرہ خاندانوں، پاکستانی حکومت اور عوام سے دلی ہمدردی کا اظہار کرتے ہیں اور زخمیوں کی جلد صحت یابی کے لیے دعاگو ہیں۔ بیان میں اس عزم کا اعادہ کیا گیا کہ ہر قسم اور شکل میں دہشت گردی بین الاقوامی امن و سلامتی کے لیے سب سے سنگین خطرہ ہے۔سلامتی کونسل نے دہشت گردی کے اس واقعے کے مرتکب افراد، منتظمین، مالی معاونین اور سرپرستوں کو انصاف کے کٹہرے میں لانے کا مطالبہ کیا اور کہا کہ کسی بھی مقصد کے تحت دہشت گردی کا عمل ناقابل قبول اور مجرمانہ ہے۔