پی ٹی آئی رہنمائوں کی بانی عمران خان سے ملاقات کی درخواست ناقابل سماعت قرار دے کر خارج کر دی گئی

اسلام آباد ( اباسین خبر) اسلام آباد ہائیکورٹ نے پاکستان تحریک انصاف (پی ٹی آئی) کے رہنمائوں جنید اکبر اور دیگر کی بانی عمران خان سے ملاقات کی درخواست ناقابل سماعت قرار دیتے ہوئے خارج کر دی۔اسلام آباد ہائیکورٹ کے جسٹس خادم حسین سومرو نے پی ٹی آئی رہنماں کی درخواست پر فیصلہ سنایا اور کہا کہ درخواست گزاروں نے بانی پی ٹی آئی سے ملاقات کے لیے بنائے گئے مکینزم پر عمل نہیں کیا۔ جیل سپرنٹنڈنٹ نے بانی پی ٹی آئی سے ملاقات کرنے والے 8 رہنماں کی فہرست پیش کی جس میں سلمان اکرم راجا، بیرسٹر گوہر، سلمان صفدر، نیاز اللہ نیازی، نعیم پنجھوتھہ، شعیب شاہین، ابوذر نیازی اور عزیر بھنڈاری شامل ہیں، جنہوں نے 10 مارچ کو بانی پی ٹی آئی سے ملاقات کی تھی۔عدالتی فیصلے میں کہا گیا کہ درخواست گزاروں نے ملاقات سے متعلق ایس او پی (اسٹینڈرڈ آپریٹنگ پروسیجر) پر عمل نہیں کیا، جس کی بنا پر ان کی درخواست ناقابل سماعت قرار دی گئی۔ عدالت نے کہا کہ درخواست گزار قانون کے مطابق ایس او پی پر عمل کرنے کے لیے پابند ہیں۔