ایف آئی اے کا ملائشیا انسانی اسمگلنگ میں ملوث 84 ایجنٹوں کے خلاف فوری کارروائی کا حکم

اسلام آباد( اباسین خبر)ڈائریکٹر ایف آئی اے اینٹی ہیومن اسمگلنگ افتخار احمد خان نے پاکستان سے ملائشیا انسانی اسمگلنگ میں ملوث 84 ایجنٹوں کے خلاف فوری کارروائی کا حکم جاری کیا ہے۔افتخار احمد خان نے ملک کے مختلف شہروں بشمول کراچی، لاہور، ملتان، گوجرانوالہ، فیصل آباد، حیدرآباد، اسلام آباد، پشاور، کوہاٹ اور کوئٹہ کے ڈائریکٹرز ایف آئی اے کو ایک مراسلہ جاری کیا ہے جس میں انہیں 84 ایجنٹوں کے خلاف فوری اور سخت کارروائی کرنے کی ہدایت دی گئی ہے۔پاکستان ہائی کمیشن کی رپورٹ کے مطابق، یہ ایجنٹس پاکستان سے کوالالمپور کے راستے انسانی اسمگلنگ میں ملوث ہیں۔ ایف آئی اے ڈائریکٹرز کو یہ بھی ہدایت کی گئی ہے کہ ان ایجنٹس کے پاسپورٹس فوری طور پر بلاک یا منسوخ کیے جائیں۔مراسلے میں مزید کہا گیا کہ اس معاملے کو اولین ترجیح دے کر اس پر مزید سخت اقدامات کیے جائیں اور تفصیلی رپورٹ 24 گھنٹوں میں ایف آئی اے ہیڈ کوارٹر پہنچائی جائے۔