سپریم کورٹ نے سپر ٹیکس سے متعلق زیرِ التوا اپیلیں منتقلی کا حکم دے دیا

اسلام آباد( اباسین خبر)سپریم کورٹ کے آئینی بینچ نے اسلام آباد اور لاہور ہائی کورٹس میں سپر ٹیکس سے متعلق زیرِ التوا اپیلوں کو سپریم کورٹ منتقل کرنے کا حکم دے دیا۔جسٹس امین الدین کی سربراہی میں پانچ رکنی آئینی بینچ نے سپر ٹیکس کے نفاذ سے متعلق کیس کی سماعت کی۔ دورانِ سماعت، درخواست گزار کے وکیل مخدوم علی خان نے اپنے دلائل میں کہا کہ حکومت براہ راست سپر ٹیکس کا نفاذ نہیں کر سکتی اور ٹیکس لگانے کی وجہ بتانا ضروری ہے۔ انہوں نے مزید کہا کہ سپر ٹیکس کے نفاذ کے لیے غیر معمولی حالات ہونے چاہیے۔وکیل نے سپریم کورٹ کے سابقہ فیصلوں کا حوالہ دیتے ہوئے کہا کہ اضافی ٹیکس کو عدالت نے غلط قرار دیا ہے اور اس کا نفاذ بنیادی حقوق کے بھی خلاف ہے۔بعد ازاں، سپر ٹیکس کیس کی سماعت کل تک ملتوی کر دی گئی۔