گورنر سندھ کا دہشت گردی کے خلاف بلوچستان کے عوام کے ساتھ کھڑے ہونے کا عزم

کراچی ( اباسین خبر)گورنر سندھ نے میڈیا سے گفتگو کرتے ہوئے کہا کہ صوبہ سندھ، بلوچستان کے ہر بلوچی بھائی کے شانہ بشانہ کھڑا ہے، اور ہمیں دہشت گردوں کا مقابلہ کرنے کے لیے عوام کو ایک ایجنڈے پر متحد کرنا ہوگا۔ انہوں نے یہ بھی کہا کہ جہاں افواج کمزور ہوں گی، وہاں دفاع بھی کمزور ہوگا، لیکن پاکستانی عوام اپنی پاک افواج کے ساتھ کھڑے ہیں۔گورنر سندھ نے کراچی میں خطاب کرتے ہوئے کہا کہ بلوچستان تک آواز پہنچنی چاہیے کہ وہاں کی عوام دہشت گردوں کے خلاف ڈٹ کر کھڑی ہے اور وہ دہشت گردوں کے مقابلے میں سب سے آگے ہوں گے۔ ان کا کہنا تھا کہ دہشت گرد پاکستان میں خوشحالی دیکھنے کے بجائے ملک کی ترقی کے عمل کو روکنا چاہتے ہیں۔گورنر سندھ نے بھارت کی آئی ٹی کی ترقی پر ناز کرنے اور چین کے پاکستان میں سرمایہ کاری کی معاملے پر دہشت گردوں کی سرگرمیاں بڑھنے کی طرف اشارہ کیا۔ انہوں نے مزید کہا کہ دہشت گرد فورا سرگرم ہو جاتے ہیں جب بھی پاکستان میں ترقی کے امکانات بڑھتے ہیں۔ایم کیو ایم پاکستان کی کوششوں کا ذکر کرتے ہوئے، گورنر سندھ نے کہا کہ ایم کیو ایم روزگار کے مواقعوں پر کام کر رہی ہے اور ملک کی ترقی کے لیے ایک مشترکہ ایجنڈے کی ضرورت ہے۔وزیراعلی بلوچستان کے بیان پر تبصرہ کرتے ہوئے، گورنر سندھ نے کہا کہ انہوں نے درست کہا کہ بیرونی ہاتھ دہشت گردی میں ملوث ہیں، اور ہمیں مل کر دہشت گردی کا ڈٹ کر مقابلہ کرنا ہوگا۔ ان کا کہنا تھا کہ بلوچستان اور سندھ کے عوام کا اتحاد دہشت گردی کے خلاف ایک طاقتور پیغام ہے اور ہمیں اس جدوجہد میں ایک دوسرے کا ساتھ دینا ہوگا۔