پاکستانی ٹینس کھلاڑی طلحہ وحید نے سب سے زیادہ کامیاب سروسز کا عالمی ریکارڈ قائم کر لیا

لاہور( سپورٹس ڈیسک)پاکستان کے سینئر ٹینس کھلاڑی طلحہ وحید نے سب سے زیادہ کامیاب ٹینس سروسز کا عالمی ریکارڈ اپنے نام کر لیا ہے۔گینز ورلڈ ریکارڈ کے مطابق، طلحہ وحید نے 1 منٹ میں 59 کامیاب ٹینس سروسز کر کے تاریخ رقم کی۔ وہ اس ریکارڈ کو قائم کرنے والے پہلے پاکستانی کھلاڑی ہیں۔ اس سے قبل یہ ریکارڈ امریکی کھلاڑی جان پیری کے پاس تھا، جنہوں نے 2019 میں 1 منٹ میں 42 کامیاب سروسز کی تھیں۔طلحہ وحید کا شمار پاکستان کے نامور سینئر ٹینس کھلاڑیوں میں ہوتا ہے، جنہوں نے 35+، 40+ اور 45+ ڈبلز کیٹیگریز میں کئی قومی ٹائٹل جیتے ہیں اور بین الاقوامی سطح پر پاکستان کی نمائندگی بھی کی ہے۔پاکستان کی جانب سے طلحہ وحید کو زبردست مبارکباد دی گئی ہے۔ صدر پاکستان ٹینس فیڈریشن (پی ٹی ایف) اعصام الحق قریشی، سیکریٹری جنرل کرنل ضیا الدین طفیل سمیت دیگر عہدیداران اور ساتھی کھلاڑیوں نے اس کامیابی کو پاکستان ٹینس کے لیے ایک اہم سنگِ میل قرار دیا ہے۔طلحہ وحید نے اس ریکارڈ کو قائم کرنے کے لیے 3 ماہ کی سخت تربیت حاصل کی تھی اور یہ ریکارڈ 8 نومبر 2024 کو لاہور میں قائم کیا تھا، تاہم گینز ورلڈ ریکارڈ نے 10 مارچ 2025 کو باضابطہ طور پر ان کی کامیابی کو تسلیم کیا۔