چینی ذخیرہ اندوزوں کے خلاف سخت کارروائی کا حکم

اسلام آباد( اباسین خبر)وزیرِ اعظم شہباز شریف نے چینی کی ذخیرہ اندوزی میں ملوث عناصر کے خلاف سخت کارروائی کا حکم دے دیا۔وزیرِ اعظم کی زیرِ صدارت ہونے والے اعلی سطح کے اجلاس میں ملک میں چینی کی سپلائی، قیمتوں کے کنٹرول اور عوام کو سستی اشیائے خور و نوش کی فراہمی پر تفصیلی تبادلہ خیال کیا گیا۔ اجلاس میں وفاقی اور صوبائی حکومتوں کو ہدایت کی گئی کہ وہ مل کر عوام کو بنیادی اشیا مناسب نرخوں پر فراہم کرنے کے اقدامات یقینی بنائیں۔شہباز شریف کا کہنا تھا کہ گزشتہ مہینوں میں حکومت کی سخت کارروائیوں کی بدولت چینی کی سمگلنگ میں کمی آئی ہے، اور رمضان میں کسی بھی قسم کی ذخیرہ اندوزی یا مصنوعی مہنگائی کو برداشت نہیں کیا جائے گا۔ انہوں نے چینی کی قیمتوں پر قابو پانے کے لیے مزید سخت اقدامات اٹھانے کی ہدایت بھی جاری کی۔اجلاس میں رمضان المبارک کے دوران اشیائے خورد و نوش کی بلاتعطل فراہمی اور قیمتوں پر سخت نگرانی کے لیے فوری اقدامات کرنے پر بھی غور کیا گیا۔وزیرِ اعظم نے واضح کیا کہ عوام کو سستی اشیا فراہم کرنا حکومت کی اولین ترجیح ہے اور اس مقصد کے لیے ہر ممکن اقدامات کیے جائیں گے۔