عدالتی حکم کے باوجود آخر عمران خان سے ملا قات کیو ں نہیں کرائی جا رہی؟: شیخ و قاص

پشاور( اباسین خبر)رہنما تحریک انصاف شیخ وقاص اکرم نے کہا ہے کہ پی ٹی آئی کے بانی عمران خان کو جیل کے ڈیتھ سیل میں قید تنہائی میں رکھا گیا ہے اور عدالتی حکم کے باوجود عمران خان سے ملاقات کی اجازت نہیں دی جا رہی۔پشاور میں پریس کانفرنس کرتے ہوئے شیخ وقاص اکرم کا کہنا تھا کہ عمران خان کو ایسے سیل میں رکھا گیا ہے جہاں دہشت گردوں کو رکھا جاتا ہے۔ انہوں نے کہا کہ عمران خان مضبوط اعصاب کے مالک ہیں اور وہ اس قسم کے ہتھکنڈوں سے ٹوٹ نہیں سکتے۔ شیخ وقاص اکرم نے مزید کہا کہ پی ٹی آئی قیادت کو جھوٹے مقدمات میں جیلوں میں ڈالا گیا ہے۔انہوں نے بتایا کہ عمران خان سے گزشتہ 6 ماہ میں صرف ایک بار سیاسی ملاقات رکھی گئی ہے، جبکہ ملاقاتیں عدالتی حکم کے مطابق رکھی جاتی تھیں۔ فیصلے کے مطابق 6 لوگ عمران خان سے ریگولر ملاقاتیں کر سکتے تھے، مگر عدالتی احکامات کی خلاف ورزی کی جا رہی ہے۔ شیخ وقاص اکرم نے کہا کہ ہم کئی بار عدالت بھی جا چکے ہیں، لیکن قیدی کو اپنے وکلا، رفقا اور خاندان کے افراد سے ملنے کا حق قانونی طور پر دیا گیا ہے اور یہ احکامات مسلسل ہوا میں اڑائے جا رہے ہیں۔شیخ وقاص اکرم کا کہنا تھا کہ ہم قانون کے دائرے میں رہتے ہوئے اپنے حق کا مطالبہ کرتے ہیں۔ پچھلی بار وکلا کو بھی 2 کلومیٹر دور روک لیا گیا اور ملاقات کے لیے جانے نہیں دیا گیا۔ وکلا اپنے اہم کیسز چھوڑ کر اڈیالہ جیل آتے ہیں، لیکن انہیں ملاقات نہیں دی جاتی۔ عدالتی احکامات کی مسلسل خلاف ورزی کی جا رہی ہے اور عدالتوں کو اپنے احکامات کی پاسداری یقینی بنانی چاہیے۔انہوں نے مزید کہا کہ ایک سابق وزیراعظم کو جیل میں ملاقاتوں کے لیے مرضی کے ہال فراہم کیے گئے تھے، جبکہ عمران خان کے لیے جیل حکام اخبارات بھی روک لیتے ہیں۔ عمران خان سے اہلیہ کی ملاقاتیں بھی 2 بار منسوخ کی گئیں۔ شیخ وقاص اکرم نے حکومت پر شدید تنقید کرتے ہوئے سوال کیا کہ وہ عمران خان سے ملاقاتوں پر پابندی لگا کر کیا حاصل کرنا چاہتی ہے۔