کراچی؛ گھر میں گھس کر فائرنگ، ڈی آئی خان سے آیا ایک بھائی جاں بحق، دوسرا زخمی

کراچی ( اباسین خبر)پیرکی صبح محمود آباد تھانے کے علاقے اعظم ٹاون گلی نمبر 9 کے ایک گھر میں فائرنگ سے نوجوان جاں بحق اوردوسرا زخمی ہوگیا، جنہیں فوری طور جناح اسپتال منتقل کیا گیا، جہاں مقتول کی شناخت 26 سالہ مسقط اللہ اورزخمی کی ذبیح اللہ کے نام سے کی گئی۔فائرنگ کے واقعے میں جاں بحق و زخمی آپس میں سگے بھائی ہیں۔ ان کے کزن سلیم نے بتایا کہ چند روز قبل ہمارے چھوٹے بھائی نعمان کی شادی ہوئی ہے۔ اور ڈیرہ اسماعیل خان گلوٹی سے شادی کی تقریب میں شرکت کرنے کے لیے آئیہوئے تھے۔انہوں نے مزید بتایاکہ صبح گھرمیں تمام افراد سو رہے تھے اور بجلی بھی گئی ہوئی تھی۔ اچانک فائرنگ کی آوازسے ہم سب اٹھ گئے، ہم نے سب سے پہلے بجلی چیک کی تو وہ بحال تھی۔ اسی اثنا میں دیکھا تومعلوم ہوا کہ ہمارا کزن ہلاک ہوچکا تھا اوردوسرے کو بازو پر گولی لگی ہوئی تھی۔ دونوں ڈیرہ اسماعیل خان گلوٹی میں اپنا ہوٹل چلاتے ہیں۔پولیس کو جائے وقوع سے 30 بور پستول کے 5 خول ملے ہیں، جنہیں پولیس نے اپنے قبضے میں لے لیا ہے۔ بظاہر فائرنگ کا واقعہ ذاتی دشمنی کا شاخسانہ لگتا ہے۔ پولیس واقعے کی سی سی ٹی وی فوٹیج حاصل کرنے کی کوشش کر رہی ہے تاکہ واقعے میں ملوث ملزم کا سراغ لگایا جا سکے ۔