پشپا کے بعد ایک اور بھارتی اداکار کے فلم ایونٹ پر آنے والے مداح ہلاک

راجمندری( شو بز دیسک)جنوبی بھارتی فلم آر آر آر کے اسٹار رام چرن اور پون کلیان کی نئی فلم گیم چینجر کے پری ریلیز ایونٹ میں شریک دو مداح ایک افسوسناک حادثے میں ہلاک ہو گئے۔بھارتی میڈیا کے مطابق، یہ حادثہ آندھرا پردیش کے شہر راجمندری میں ایونٹ کے بعد پیش آیا، جہاں مداح اراوا منیکانتا اور تھوکڑا چرن واپسی پر موٹر سائیکل پر سفر کر رہے تھے۔ دورانِ سفر، مخالف سمت سے آنے والی ایک وین سے ٹکرا کر دونوں شدید زخمی ہو گئے۔ انہیں فورا اسپتال منتقل کیا گیا، تاہم زخموں کی تاب نہ لاتے ہوئے دونوں مداح دم توڑ گئے۔ پولیس نے حادثے کا مقدمہ درج کر لیا ہے۔فلم کے پروڈیوسر دل راجو نے حادثے پر افسوس کا اظہار کرتے ہوئے متاثرہ خاندانوں کے لیے 10 لاکھ بھارتی روپے کی امداد کا اعلان کیا ہے۔یہ پہلا موقع نہیں ہے جب فلم ایونٹ کے دوران مداح حادثے کا شکار ہوئے ہوں۔ اس سے قبل جنوبی بھارتی سپر اسٹار الو ارجن کی فلم پشپا 2 کے پریمیئر کے موقع پر بھگدڑ کے نتیجے میں ایک خاتون مداح ہلاک ہو گئی تھی، جس کے باعث پولیس نے الو ارجن کو گرفتار بھی کر لیا تھا۔