میلبرن کرکٹ گراؤنڈ میں شائقین کی آمد کا 87 سال پرانا ریکارڈ ٹوٹ گیا

میلبرن( سپورٹس ڈیسک)بھارت اور آسٹریلیا کے درمیان جاری چوتھے ٹیسٹ میچ نے میلبرن کرکٹ گرانڈ (ایم سی جی) پر شائقین کا ایک نیا ریکارڈ قائم کیا ہے۔ پانچ روزہ میچ کے دوران 3 لاکھ 50 ہزار 700 سے زیادہ شائقین نے میدان کا رخ کیا، جس سے 1937 کا ریکارڈ ٹوٹ گیا تھا، جب 3 لاکھ 50 ہزار 534 کرکٹ شائقین نے میدان میں آکر میچ دیکھا تھا۔کرکٹ آسٹریلیا نے اس بات کی تصدیق کی کہ میچ کے پانچویں دن پہلے سیشن میں 51 ہزار 371 شائقین میدان میں موجود تھے، اور مزید شائقین کی آمد متوقع تھی۔ اس کا مطلب یہ ہے کہ 2024 کے ایم سی جی باکسنگ ڈے ٹیسٹ کو اس میچ سے زیادہ لوگوں نے دیکھا جو سر ڈونلڈ بریڈمین کی قیادت میں آسٹریلیا نے جنوری 1937 میں انگلینڈ کے خلاف کھیل کر یہ ریکارڈ بنایا تھا۔روزانہ کی بنیاد پر شائقین کی تعداد میں بھی غیر معمولی اضافہ رہا، جس میں 87 ہزار، 85 ہزار، 83 ہزار، 43 ہزار اور 51 ہزار سے زیادہ شائقین شامل تھے۔ یہ ریکارڈ ایونٹ ایم سی جی میں 2022 کے ٹی 20 ورلڈ کپ میں بھارت اور پاکستان کے میچ سے زیادہ شائقین کی موجودگی کے بعد قائم ہوا، جب 90 ہزار 293 شائقین نے اس میچ کو دیکھا تھا۔