مذہبی جماعت کا کراچی میں دھرنے جاری رکھنے کا اعلان

کرا چی ( اباسین خبر)مجلس وحدت مسلمین کے رہنما علامہ حسن ظفر نقوی نے کہا ہے کہ ان کے دھرنے پر امن ہیں اور وہ کسی سیاسی گروہ کا حصہ نہیں ہیں۔ انہوں نے سندھ حکومت پر زور دیا کہ وہ سیاسی فائدہ حاصل کرنے کی کوشش نہ کرے اور پارا چنار کی عوام سے اپیل کی کہ اگر وہ اپنا دھرنا ختم کر دیں تو وہ بھی اپنا دھرنا ختم کر دیں گے۔علامہ حسن ظفر نقوی نے نمائش چورنگی پر دھرنے کے دوران ہنگامی پریس کانفرنس میں یہ باتیں کیں، جس میں دیگر رہنماں بھی موجود تھے۔ ان کا کہنا تھا کہ دھرنے کا مقصد عوامی مسائل پر احتجاج کرنا ہے اور ان کے دھرنے میں کوئی فرقہ واریت نہیں ہے۔ انہوں نے کہا کہ اگر سندھ بھر میں دھرنوں کی کال دی گئی تو حکومت انہیں روک نہیں سکے گی اور وہ کسی بھی غیر جمہوری دبا کو نہیں برداشت کریں گے۔انہوں نے مزید کہا کہ دھرنے میں کسی سیاسی جماعت کا کوئی کردار نہیں بلکہ یہ مظلوموں کا دھرنا ہے، جس میں مختلف مسالک اور مذاہب کے افراد شریک ہو رہے ہیں۔ علامہ حسن ظفر نقوی نے کہا کہ پارا چنار کے عوام کو بنیادی مسائل کا سامنا ہے، جہاں امدادی سامان کی کمی ہے اور ایک ہیلی کاپٹر کے ذریعے پانچ لاکھ کی آبادی کو خوراک فراہم کی جا رہی ہے۔انہوں نے یہ بھی کہا کہ شہر میں جاری دھرنوں سے کاروبار متاثر نہیں ہوا اور اہلسنت عمائدین نے دھرنوں کے شرکا کے لیے پانی کی سبیلیں لگائی ہیں۔ ان کا کہنا تھا کہ انتظامیہ سے بات چیت جاری ہے اور دھرنے پر امن رہیں گے، تاہم احتجاجی دھرنے جاری رہیں گے۔