دل کے ناکام پٹھے کن افراد میں ازسرنو اپنی مرمت کرنے لگ جاتے ہیں؟

نیو یارک ( ہیلتھ ڈیسک)ایریزونا یونیورسٹی کی تحقیقی ٹیم نے ایک اہم دریافت کی ہے کہ مصنوعی دل کے مریض دل کے پٹھوں کو دوبارہ پیدا کرسکتے ہیں جو پہلے بالکل ناکارہ ہوچکے تھے۔ اس تحقیق کی قیادت کرنے والے ڈاکٹر ہشام صادق نے کہا کہ اس دریافت سے دل کی بیماریوں کے علاج کے نئے طریقے دریافت ہو سکتے ہیں، اور شاید کبھی دل کی خرابی کا مکمل علاج بھی ممکن ہو سکے۔یہ تحقیق جرنل سرکولیشن میں شائع ہوئی ہے، جس میں ڈاکٹر ہشام صادق نے وضاحت کی کہ ہڈیوں کے پٹھوں میں چوٹ لگنے کے بعد ان میں دوبارہ پیدا ہونے کی صلاحیت ہوتی ہے، لیکن دل کے پٹھے اس صلاحیت سے محروم ہوتے ہیں اور دل کی چوٹ ٹھیک نہیں ہوتی۔ ڈاکٹر صادق نے بین الاقوامی ماہرین کی ایک ٹیم کی قیادت کی، جس میں یہ تحقیق کی گئی کہ آیا دل کے پٹھے کسی تکنیک سے دوبارہ پیدا ہو سکتے ہیں یا نہیں۔محققین نے اپنے مطالعے میں یہ پایا کہ مصنوعی دل والے مریض صحت مند دلوں والے افراد کی نسبت چھ گنا تیز شرح سے دل کے پٹھوں کے خلیات کو دوبارہ پیدا کرسکتے ہیں۔ اس تحقیق کا مقصد دل کی بیماریوں کے علاج میں انقلابی تبدیلیاں لانا ہے اور دل کے پٹھوں کی مرمت کے نئے طریقے دریافت کرنا ہے۔