ملک میں موسم سرد، بالائی علاقوں میں شدید سرد رہنے کا امکان

لاہور( اباسین خبر)محکمہ موسمیات کے مطابق ملک کے بیشتر علاقوں میں موسم سرد اور بالائی علاقوں میں شدید سرد رہنے کا امکان ہے۔ پنجاب، بالائی سندھ اور خیبر پختونخوا کے میدانی علاقوں میں دھند چھائی رہے گی۔ اسلام آباد، خطہ پوٹھوہار اور خیبر پختونخوا کے بعض میدانی علاقوں میں کہرا بھی پڑنے کی توقع ہے۔گزشتہ 24 گھنٹوں کے دوران سب سے کم درجہ حرارت لہہ اور اسکردو میں منفی 12 ڈگری سینٹی گریڈ ریکارڈ کیا گیا۔ کوئٹہ اور بلوچستان کے شمالی علاقوں میں درجہ حرارت منفی ہونے کے بعد تالاب، جوہڑ اور سڑکوں پر پڑا پانی جم گیا۔ قلات میں درجہ حرارت منفی 7 اور کوئٹہ میں منفی 6 ڈگری سینٹی گریڈ ریکارڈ کیا گیا۔ اس کے علاوہ، مالم جبہ، چترال، دیر، مری، راولاکوٹ اور گلگت بلتستان کے کئی اضلاع میں پارا نقطہ انجماد سے نیچے چلا گیا۔