ہائی پرفارمنس کوچ ٹم نیلسن کا پاکستانی ٹیم کیساتھ سفر تمام

لاہور( سپورٹس ڈیسک)پاکستان کرکٹ بورڈ (پی سی بی) نے ٹیسٹ ٹیم کے ہائی پرفارمنس کوچ ٹم نیلسن کے ساتھ معاہدہ ختم کر دیا ہے اور ان کے معاہدے میں مزید توسیع نہ کرنے کا فیصلہ کیا ہے۔پی سی بی نے جنوبی افریقا کے خلاف ٹیسٹ سیریز کے لیے ٹم نیلسن کے معاہدے میں توسیع نہیں کی۔ ٹم نیلسن نے کرکٹ ویب سائٹ سے بات کرتے ہوئے کہا کہ وہ معاہدے کی توسیع کے حوالے سے منتظر تھے، اور وہ سمجھتے تھے کہ ان کی کارکردگی اچھی جا رہی تھی۔ نیلسن نے کہا کہ جنوبی افریقا اور ویسٹ انڈیز کے خلاف سیریز کے لیے تیاریاں ہو رہی تھیں، لیکن پی سی بی نے انہیں بتایا کہ ان کی خدمات اب درکار نہیں ہیں۔یاد رہے کہ ٹم نیلسن کو ریڈ بال ہیڈ کوچ جیسن گلیسپی نے اپنے ساتھ لایا تھا اور اگست میں ان کی ٹیسٹ ٹیم کے ساتھ تقرری کی گئی تھی۔ تاہم، خبریں یہ بھی زیر گردش ہیں کہ پی سی بی نے جیسن گلیسپی کو بھی اس فیصلے سے آگاہ نہیں کیا کیونکہ اب پی سی بی کا گلیسپی پر اعتماد نہیں رہا۔کرکٹ ماہرین کے مطابق، جیسن گلیسپی کا پاکستان ٹیسٹ ٹیم کے ساتھ مستقبل خدشات کا شکار نظر آ رہا ہے، حالانکہ پی سی بی نے جنوبی افریقا کے خلاف ٹیسٹ سیریز کے لیے جیسن گلیسپی کو ہیڈ کوچ کے طور پر مقرر کیا تھا۔