آپؐ کی زندگی کا ہر پہلو ہمارے لیے مشعل راہ ہے: بلاول بھٹو

اسلام آباد( اپنے رپورٹر سے)چیئرمین پاکستان پیپلزپارٹی بلاول بھٹو زرداری نے کہا ہے کہ آپۖ کی زندگی کا ہر پہلو ہمارے لیے مشعل راہ ہے۔بلاول بھٹو زرداری نے عید میلادالنبیۖ کے موقع پر دلی مبارکباد دیتے ہوئے کہا ہے کہ حضرت محمدۖ پوری انسانیت کے لیے رحمت بن کر آئے، آپۖ کی زندگی کا ہر پہلو ہمارے لیے مشعل راہ ہے، پیغمبرِ اسلامۖ کا پیغام ہر زمانے اور مقام سے بالاتر ہے۔چیئرمین پیپلزپارٹی کا کہنا تھا کہ نبی اکرمۖ کا پیغام تمام نسلوں اور قوموں کے لیے رہنمائی ہے، آپۖ کی تعلیمات کی روشنی میں معاشرے میں امن، برداشت اور بھائی چارے کی فضا قائم کرنا ہے۔انہوں نے مزید کہا کہ نبیۖ کی تعلیمات کی روشنی میں ہمیں دوسروں کی زندگیوں میں آسانیاں اور سکون پیدا کرنے کی کوشش کرنی چاہیے، ہمیں اپنے ذاتی اور اجتماعی معاملات میں ان اقدار کو اپنانا چاہیے جن کی حضرت محمدۖ نے تعلیم دی ہے۔