مون سون ہواؤں کے کم دباو میں مزید شدت، کراچی میں آج سے بارش کا امکان

کراچی( اپنے رپورٹر سے) وسطی بھارت پر موجود مون سون ہواں کا کم دباو مزید شدت اختیار کر گیا جس کے باعث آج کراچی میں ہلکی اور دیہی سندھ کے مختلف اضلاع میں تیز بارشیں ہوسکتی ہیں۔محکمہ موسمیات کے مطابق گزشتہ روز ڈپریشن میں تبدیل ہونے والا سسٹم مزید ایک درجہ شدت اختیار کرکے طاقتور سسٹم ڈیپ ڈپریشن کی شکل اختیار کر چکا ہے، بارشوں کا سسٹم بتدریج مشرقی سندھ کی جانب بڑھ رہا ہے۔کراچی میں کل 27 اگست سے موسلادھار بارشیں ہونے کا امکان ہے جبکہ بارشوں کا سلسلہ وقفے وقفے سے 31 اگست تک برقرار رہ سکتا ہے۔ تندوتیز ہواں کے ساتھ بارش اربن فلڈنگ کا سبب بن سکتی ہے۔محکمہ موسمیات کا کہنا ہے کہ ماہی گیروں کو کھلے سمندر میں مچھلی کے شکار پر جانے سے گریز کا مشورہ دیا جاتا ہے۔