پنجاب بھر میں عید کی خریداری کے دوران خواتین کے تحفظ کے لیے لیڈی پولیس اہلکار تعینات

لاہور( اباسین خبر)پنجاب کے مختلف اضلاع میں عیدالفطر کی خریداری کے دوران بازاروں میں خواتین کے تحفظ کے لیے لیڈی پولیس اہلکار تعینات کردی گئی ہیں۔ رمضان المبارک کے آخری عشرے میں بازاروں میں خریداروں کا رش بڑھ گیا ہے، اور فیملیز بھی خریداری میں مصروف ہیں۔خواتین کے تحفظ کو یقینی بنانے کے لیے مختلف اضلاع میں خواتین پولیس اہلکار موٹر سائیکل اور سائیکل پر بازاروں اور مارکیٹوں کا گشت کر رہی ہیں۔ سرگودھا میں بھی خواتین پولیس افسران پر مشتمل موٹر سائیکل اسکواڈ تشکیل دی گئی ہے اور اضافی نفری تعینات کی گئی ہے۔ ڈسٹرکٹ پولیس آفیسر محمد صہیب اشرف نے کہا کہ اسٹریٹ کرائمز، ہراسانی اور دیگر جرائم کی روک تھام کے لیے لیڈی اسکواڈ اہم کردار ادا کرے گا۔بھکر میں بھی خواتین پولیس اہلکار بازاروں میں تعینات ہیں اور موٹر سائیکل اسکواڈ کا گشت جاری ہے۔ عید کی خریداری کے لیے آنے والی خواتین نے پولیس کے اس اقدام پر خوشی کا اظہار کرتے ہوئے کہا کہ اس سے وہ بازاروں میں خود کو محفوظ محسوس کرتی ہیں۔