خیبرپختونخوا دہشتگردی اور کرپشن میں نمبر ون پر ہے: وزیراطلاعات پنجاب

لاہور( اباسین خبر) وزیراطلاعات پنجاب عظمی بخاری نے خیبرپختونخوا کے مشیر اطلاعات بیرسٹر سیف کے بیان پر ردعمل دیتے ہوئے کہا ہے کہ خیبرپختونخوا لاقانونیت، دہشت گردی اور کرپشن میں سبقت لے رہا ہے۔عظمی بخاری نے کہا کہ ایک سال میں 365 دن ہوتے ہیں، اور اگر خیبرپختونخوا حکومت نے 625 منصوبے شروع کیے ہیں تو وہ منصوبے بھی ایک ارب درختوں کی طرح حقیقت میں نہیں ہوں گے۔ انہوں نے مزید کہا کہ وہ کبھی نہیں دیکھیں گے کہ خیبرپختونخوا کے کسی وزیر یا وزیراعلی نے ایک سال میں نئے منصوبوں کا افتتاح کیا ہو۔ “ایک سال میں 625 دفعہ تو وزیر اعلی دفتر تک نہیں آئے، کیا یہ منصوبے موکلات نے شروع کروادئیے؟”صوبائی وزیر اطلاعات نے کے پی حکومت کو شدید تنقید کا نشانہ بناتے ہوئے کہا کہ جس صوبے کے پاس یونیورسٹیوں کو چلانے کا بجٹ نہیں، وہاں یونیورسٹیوں کی زمینیں بیچنی پڑیں، وہ 625 منصوبوں کے شروع ہونے کی بات نہ کرے۔ انہوں نے کہا کہ خیبرپختونخوا میں سرکاری ملازمین اپنے واجبات کے لئے اور بلدیاتی نمائندے فنڈز کے لیے ہر ہفتے احتجاج کرتے ہیں۔عظمی بخاری نے کہا کہ علی امین کی ترجیحات میں صوبے کے غریب عوام نہیں، بلکہ اڈیالہ کا قیدی ہے۔ انہوں نے کہا کہ خیبرپختونخوا میں کرپشن اپنے عروج پر ہے اور احتساب کمیٹی کے اراکین خود اس میں ملوث ہیں۔ “گھڑیاں، انگوٹھیاں اور 190 ملین کے ڈاکے مارنے والے کی احتساب کمیٹی خود قابل احتساب ہے۔”لیگی رہنما نے یہ بھی کہا کہ خیبرپختونخوا کو وفاق سے ملنے والے فنڈز صرف جلسوں، دھرنوں اور بندر بانٹ کی نذر ہو رہے ہیں، اور وفاقی حکومت کو خیبرپختونخوا کو دیے گئے فنڈز کا آڈٹ کرانا چاہیے۔