محکمہ جواب دے سحر وافطار میں گیس لوڈشیڈنگ کی کیو ں شکا یت آئی؟: وزیراعظم

اسلام آباد( اباسین خبر)وزیراعظم شہباز شریف نے ملک بھر میں ماہ رمضان کے دوران سحر و افطار کے اوقات میں گیس لوڈشیڈنگ کی شکایات کا سخت نوٹس لیتے ہوئے پٹرولیم ڈویژن سے رپورٹ طلب کر لی۔وزیراعظم نے گیس لوڈشیڈنگ پر برہمی کا اظہار کرتے ہوئے کہا کہ سحری اور افطاری کے اوقات میں گیس کی بلا تعطل فراہمی کو یقینی بنایا جائے۔دوسری جانب سوئی ناردرن گیس کے ترجمان نے اپنے بیان میں کہا کہ وزیراعظم کی ہدایات کے مطابق فوری طور پر ایکشن لیا جائے گا اور سحر و افطار کے اوقات میں گیس کی فراہمی ہر صورت جاری رکھی جائے گی۔ شہریوں کو کسی بھی شکایت کی صورت میں 1199 پر رابطہ کرنے کی ہدایت کی گئی ہے۔یاد رہے کہ گزشتہ روز وزیراعظم شہباز شریف نے چینی کی ذخیرہ اندوزی میں ملوث افراد کے خلاف سخت کارروائی کرنے کا حکم بھی دیا تھا۔ انہوں نے کہا کہ حکومت کی گزشتہ کارروائیوں کے نتیجے میں چینی کی سمگلنگ پر قابو پایا گیا ہے اور رمضان کے دوران ذخیرہ اندوزی یا مصنوعی مہنگائی کو ہرگز برداشت نہیں کیا جائے گا۔ چینی کی قیمتوں کو قابو میں رکھنے کے لیے مزید سخت اقدامات اٹھائے جائیں گے۔