افغانستان: بارش و ژالہ باری کی تباہ کاریاں، 29 افراد جاں بحق

کابل ( مانیٹرنگ ڈیسک)افغانستان کے مغربی صوبے فراہ اور جنوبی صوبے قندھار میں شدید بارشوں اور ژالہ باری کے باعث تباہ کاریاں جاری ہیں، جس کی وجہ سے 29 افراد جاں بحق ہو گئے ہیں۔ مقامی حکام کے مطابق، مغربی صوبہ فراہ میں 21 افراد ہلاک ہو گئے ہیں جبکہ 6 افراد زخمی ہوئے ہیں۔ جنوبی صوبہ قندھار میں 8 افراد جان سے گئے ہیں، جن میں خواتین اور بچے شامل ہیں۔قندھار کے مقامی ڈیزاسٹر مینجمنٹ ڈیپارٹمنٹ کے مطابق، کپڑے دھونے میں مصروف 4 خواتین سیلابی پانی میں بہہ گئیں، جن میں سے ایک خاتون زندہ بچ گئی۔ ایک خاندان پر چھت گرنے سے 1 خاتون اور 3 بچے ہلاک ہو گئے۔واضح رہے کہ افغانستان کو موسمیاتی تبدیلیوں کے حوالے سے چھٹا سب سے زیادہ متاثرہ ملک قرار دیا گیا ہے۔ گزشتہ سال مئی میں افغانستان میں سیلاب نے سیکڑوں افراد کی جان لے لی تھی اور بڑے پیمانے پر زرعی زمینوں کو نقصان پہنچایا تھا۔