لاہور( ہیلتھ ڈیسک)لاہور کے چلڈرن ہسپتال میں بون میرو ٹرانسپلانٹ کے 150 کامیاب آپریشنز مکمل ہوچکے ہیں، اور ان آپریشنز پر حکومت پنجاب نے 42 لاکھ روپے سے زائد کے اخراجات برداشت کیے ہیں۔ یہ ہسپتال پاکستان میں بون میرو ٹرانسپلانٹ کرنے والا پہلا سرکاری ادارہ ہے۔چلڈرن ہسپتال کے کینسر وارڈ میں گزشتہ ایک سال کے دوران 2000 مریضوں کا علاج کیا گیا اور او پی ڈی میں 25 ہزار سے زائد کینسر کے مریض بچوں کو علاج کی سہولت فراہم کی گئی۔ بون میرو ٹرانسپلانٹ آپریشن میں کامیابی کا تناسب عالمی معیار کے مطابق 89 فیصد سے زائد رہا۔چلڈرن ہسپتال لاہور میں نہ صرف مقامی مریض بچے بلکہ سندھ، بلوچستان اور دیگر صوبوں کے مریض بچے بھی بون میرو ٹرانسپلانٹ کرانے کے لیے آتے ہیں۔ حتی کہ افغانستان سے آنے والے مریض بچوں کا بھی فری بون میرو ٹرانسپلانٹ کیا گیا۔وزیراعلی پنجاب مریم نواز نے کہا ہے کہ “ہر بچہ میرے لیے اپنے بچوں سے بھی بڑھ کر ہے”، اور وہ جلد بون میرو ٹرانسپلانٹ کارڈ کا اجرا کریں گی جس کے بعد مریض بچوں کے والدین اخراجات سے آزاد ہو جائیں گے۔ وزیراعلی نے کہا کہ “مفت علاج ہر مریض بچے کا حق ہے” اور “بچوں کی صحت پر کوئی سمجھوتہ نہیں کیا جائے گا، تمام وسائل مہیا کیے جائیں گے”۔
چلڈرن ہسپتال میں حکومتی خرچ پر بون میرو ٹرانسپلانٹ کے 150 کامیاب آپریشن
2
