ملک میں خاموش مارشل لاء نافذ ہے: حافظ حمداللّٰہ

کو ئٹہ ( اباسین خبر)جمعیت علمائے اسلام (جے یو آئی) کے رہنما حافظ حمد اللہ نے ملک کی سیاسی صورتحال پر کڑی تنقید کرتے ہوئے کہا کہ ملک میں “خاموش مارشل لا” نافذ ہے، اور یہ کہ مارشل لا لگانے کی ضرورت نہیں رہی کیونکہ اس کا اثر پہلے ہی موجود ہے۔انہوں نے مزید کہا کہ موجودہ حکومت جمہوریت کے نام پر حقیقت میں اس کا قتل کر رہی ہے، اور اس سے پہلے ڈکٹیٹروں کے ہاتھوں جمہوریت کا قتل ہوتا رہا ہے۔ حافظ حمد اللہ کے مطابق، موجودہ وزیرِ اعظم جو “نام نہاد جمہوری شیروانی” میں ملبوس ہیں، وہ جمہوریت کا قتل کر رہے ہیں۔ان کا کہنا تھا کہ پارلیمنٹ میں قانون سازی غیر سیاسی اشرافیہ کے اشاروں پر ہو رہی ہے اور میڈیا کی آزادی کو سلب کرنے کے لیے “پیکا ایکٹ” جیسے سیاہ قوانین نافذ کیے گئے ہیں۔ انہوں نے مزید کہا کہ حکومتی سیاسی پارٹیاں غیر جمہوری اشرافیہ کے ہاتھوں میں کھلونا بنی ہوئی ہیں، اور قوم کو موجودہ اسمبلیوں اور حکومتوں پر کوئی اعتماد نہیں ہے۔