اپوزیشن جماعتوں میں اختلافات موجود، پی ٹی آئی کا ایجنڈا عمران کی رہائی ہے: شاہد خاقان

اسلام آباد( اباسین خبر)سربراہ عوام پاکستان پارٹی شاہد خاقان عباسی نے کہا ہے کہ اپوزیشن جماعتوں کے درمیان اختلافات موجود ہیں اور تحریک انصاف کا ایجنڈا عمران خان کی رہائی ہے۔دنیا نیوز کے پروگرام بات نکلے گی میں گفتگو کرتے ہوئے شاہد خاقان عباسی نے کہا کہ ہماری کنٹینر پر جانے کی کوئی سوچ نہیں، اگر کوئی جماعت جلسے کرنا چاہتی ہے تو وہ اپنے طور پر کر لے۔ انہوں نے مزید کہا کہ اپوزیشن جماعتوں کے درمیان اختلافات ہیں، اور تحریک انصاف کا بنیادی ایجنڈا عمران خان کی رہائی ہے۔شاہد خاقان عباسی نے کہا کہ 26ویں ترمیم کے بعد چیف جسٹس کے پاس کوئی اختیار نہیں رہا، اب عدل کا نظام چیف جسٹس کے بجائے حکومت کے پاس ہے۔ انہوں نے کہا کہ عدلیہ بحالی تحریک دراصل جنرل مشرف کو ہٹانے کے لیے تھی۔انہوں نے ایک اور سوال کے جواب میں کہا کہ حکومت نے جنرل مشرف کا طیارہ باہر بھیجنے کی کوشش کی، مگر وہ باہر نہیں جا سکتا تھا۔ آرمی چیف کی تبدیلی کو فوج نے قبول نہیں کیا تھا۔شاہد خاقان عباسی نے مزید کہا کہ جنرل باجوہ نے ہماری حکومت کو ختم کرایا، اور وزیراعظم بننے کے بعد جنرل باجوہ نے مجھ سے ملاقات کی اور کہا کہ “آپ کی عزت کرنا ہماری ذمہ داری ہے۔”ڈان لیکس کے بارے میں انہوں نے کہا کہ جنرل باجوہ اور نواز شریف مجھ سے ناراض تھے، اور نوازشریف نے محسوس کیا کہ ان کے ساتھ ناانصافی ہوئی ہے۔