گوجرانوالہ: سٹیل مل میں پگھلا لوہا مزدوروں پر گرنے سے 4 افراد جاں بحق

گوجرانوالہ( اباسین خبر)گوجرانوالہ میں سٹیل مل میں پگھلا ہوا لوہا مزدوروں پر گرنے سے 4 افراد جاں بحق ہو گئے۔ذرائع کے مطابق، گوجرانوالہ کے علاقہ ایمن آباد کے قریب دیوان روڈ پر واقع سٹیل مل میں یہ خوفناک حادثہ پیش آیا۔ سٹیل مل کی بھٹی میں انتہائی درجہ حرارت پر پگھلایا جانے والا لوہا بوائلر کے عدم توازن کے باعث مزدوروں پر گر گیا۔ حادثے میں چار مزدور جاں بحق جبکہ تین زخمی ہو گئے۔ریسکیو حکام کے مطابق جاں بحق ہونے والوں میں وکیل، ندیم، عاطف اور صدام شامل ہیں۔ زخمی مزدوروں کو تشویشناک حالت میں ہسپتال منتقل کر دیا گیا ہے، جبکہ فیکٹری میں حفاظتی انتظامات کا جائزہ لیا جا رہا ہے۔