لاہور ہائیکورٹ بار کے سالانہ انتخابات کا میلہ کل سجے گا

لاہور( اباسین خبر)لاہور ہائیکورٹ بار ایسوسی ایشن کے سالانہ انتخابات کل ہوں گے، جس میں صدر سمیت تین نشستوں پر سات امیدوار مد مقابل ہیں۔صدر کے عہدے کے لیے عاصمہ جہانگیر گروپ کے ثاقب اکرم گوندل اور حامد خان گروپ کے آصف نسوانہ میں مقابلہ ہوگا، جبکہ سیکرٹری کی نشست پر فرخ الیاس چیمہ اور قاسم اعجاز سمرا میں جوڑ پڑے گا۔نائب صدر کی نشست پر شیخ حسیب بن یوسف، عبد الرحمان رانجھا اور عبدالرزاق چدھڑ مد مقابل ہیں۔ فنانس سیکرٹری کی نشست پر حسام بن شعیب کمبوہ بلا مقابلہ منتخب ہوچکے ہیں۔چیئرمین الیکشن بورڈ شہزاد احمد منڈ نے بتایا کہ انتخابات کی تمام تیاریاں مکمل ہیں۔ لاہور ہائیکورٹ بار کے کل ممبران کی تعداد 44,232 ہے، جن میں سے 30,763 رجسٹرڈ ووٹرز بائیومیٹرک سسٹم کے تحت ووٹ ڈال سکیں گے۔انہوں نے مزید کہا کہ 2,287 خواتین اور 28,476 مرد ووٹرز حق رائے دہی استعمال کریں گے، جبکہ انتخابی عمل کے لیے سات پولنگ بوتھ اور 120 کمپیوٹر نصب کیے جائیں گے۔ پولنگ صبح 9 بجے سے شام 5 بجے تک ہوگی۔ ضابطہ اخلاق کی خلاف ورزی پر سخت کارروائی کی جائے گی۔