ہم رکنے والے نہیں، ملک گیر تحریک شروع کریں گے: سلمان اکرم راجا

پشاور( اباسین خبر)پاکستان تحریک انصاف کے سیکرٹری جنرل سلمان اکرم راجا نے کہا ہے کہ ہم ملک گیر تحریک شروع کریں گے اور رکنے والے نہیں ہیں۔پشاور میں میڈیا سے گفتگو کرتے ہوئے سلمان اکرم راجا نے کہا کہ ہم جمہوریت کے لیے تاریخی جدوجہد کر رہے ہیں۔ رمضان کے قریب آتے ہوئے کچھ اہم سرگرمیاں ہیں، اس لیے پارٹی کے کچھ اکابرین سے ملاقات کے لیے پشاور آیا ہوں۔انہوں نے کہا کہ آئین کی بالادستی کے لیے آواز اٹھائیں گے اور قوم کو اکٹھا کریں گے۔ آج شاہد خاقان عباسی سے ملاقات ہے اور کل کراچی جائیں گے جہاں سندھ کی جماعتوں سے بھی ملاقاتیں ہوں گی۔سلمان اکرم راجا نے کہا کہ تحریک رمضان کے دوران اور بعد میں بھی جاری رہے گی۔ انہوں نے مزید کہا کہ صوبائی صدر جنید اکبر اچھا کام کر رہے ہیں، اور عاطف خان، ارباب شیر علی سے بھی ملاقات کی ہے۔انہوں نے کہا کہ علی امین گنڈاپور کو پارٹی عہدے سے ہٹانا اچھا فیصلہ تھا، جس سے پارٹی مزید متحرک ہوئی ہے۔ صوابی جلسے میں کم شرکت کے بارے میں جنید اکبر کوشش کر رہے ہیں، اور کمی بیشی کا جائزہ لے رہے ہیں۔