پنجاب کو حقیقی معنوں میں فوڈ باسکٹ بنانے پر کام جاری ہے :عظمیٰ بخاری

لاہور( اباسین خبر)صوبائی وزیر اطلاعات عظمی بخاری نے کہا ہے کہ پنجاب کو حقیقی معنوں میں فوڈ باسکٹ صوبہ بنانے کے لیے تیزی سے کام جاری ہے۔اپنے بیان میں عظمی بخاری نے کہا کہ پنجاب میں زراعت، صنعت اور انفراسٹرکچر اپنے عروج پر ہیں اور مریم نواز ہر شعبے میں انقلابی اور تاریخی اقدامات اٹھا رہی ہیں۔ انہوں نے بتایا کہ پنجاب کی تاریخ میں پہلی بار کسانوں کے لیے 400 ارب روپے کا کسان کارڈ پروگرام شروع کیا گیا ہے۔عظمی بخاری نے مزید کہا کہ کسانوں کو گرین ٹریکٹرز، سپر سیڈرز اور کرایہ پر مشینری کی فراہمی کا سلسلہ بھی کامیابی سے جاری ہے۔ مریم نواز پنجاب کے تمام اضلاع میں بلاتفریق لوگوں کو ریلیف دے رہی ہیں۔انہوں نے رمضان نگہبان پیکیج کے تحت مستحق افراد کو ان کے گھروں تک راشن پہنچانے کا بھی ذکر کیا۔ ساتھ ہی انہوں نے کہا کہ خیبر پختونخواہ اور سندھ کا مریم نواز کے اچھے اقدامات کو فالو کرنا خوش آئند ہے، اور اگر مریم نواز کی وجہ سے دیگر صوبوں کے لوگ بھی ریلیف حاصل کرتے ہیں تو یہ ایک مثبت قدم ہوگا۔عظمی بخاری نے کہا کہ مریم نواز کا ویژن اور پالیسی صرف عوامی فلاح و بہبود کے لیے ہیں، اور مخالفین کو ان کی تنقید کے بجائے اپنے عوامی مسائل حل کرنے پر توجہ دینی چاہیے۔