آئی ایم ایف وفد کا دورہ مکمل، مالیاتی گورننس، انسداد بدعنوانی اور منی لانڈرنگ پر بریفنگ

اسلام آباد(کامرس ڈیسک)عالمی مالیاتی فنڈ (آئی ایم ایف) کا تجزیاتی مشن پاکستان کا دورہ مکمل کرنے کے بعد واپس روانہ ہوگیا۔سرکاری ذرائع کے مطابق، آئی ایم ایف ٹیم نے سیکرٹری کابینہ ڈویژن کی سربراہی میں وزارتوں کے حکام سے ملاقات کی۔ مشن نے وزارت خزانہ، اقتصادی امور، تجارت، اور نجکاری کے نمائندوں سے بھی ملاقات کی۔ملاقات میں مشن کی سفارشات پر گورننس اور احتساب بہتر بنانے کے لیے اقدامات پر بات چیت ہوئی۔ آئی ایم ایف وفد نے فنانشل مانیٹرنگ یونٹ کے حکام سے بھی ملاقات کی، جہاں انہیں ایف ایم یو کی ورکنگ اور کارکردگی سے متعلق بریفنگ دی گئی۔ مشکوک مالی ترسیلات اور دہشت گردوں کی مالی معاونت روکنے کے اقدامات پر تفصیلی بات چیت کی گئی۔آئی ایم ایف وفد نے آڈیٹر جنرل پاکستان سے بھی ملاقات کی اور آفس کے کام کے طریقہ کار اور پی اے سی کی ہدایات پر عملدرآمد سے متعلق سوالات کیے۔خیال رہے کہ گزشتہ دنوں آئی ایم ایف وفد نے چیف جسٹس آف پاکستان جسٹس یحیی آفریدی اور وکلا سے بھی ملاقات کی۔