عمران خان کا آرمی چیف کو خط ترلے کی آخری حد ہے: ملک احمد خان

لاہور( اباسین خبر)سپیکر پنجاب اسمبلی ملک محمد احمد خان نے بانی پی ٹی آئی عمران خان کے آرمی چیف کو خط لکھنے کو ترلے کرنے کی آخری حد قرار دیا ہے۔پنجاب اسمبلی کے احاطے میں صحافیوں سے گفتگو کرتے ہوئے سپیکر ملک احمد خان نے کہا کہ خط کا مفصل جواب وصول کنندہ کی جانب سے آ چکا ہے، اور جن کو خط لکھا گیا تھا، ان کا کہنا ہے کہ وہ اس خط کو پڑھیں گے بھی نہیں اور اسے ویسے ہی وزیر اعظم کو بھیج دیں گے۔ انہوں نے مزید کہا کہ اگر خط وصول کنندہ نہیں پڑھیں گے تو وزیر اعظم بھی نہیں پڑھیں گے۔انہوں نے کہا کہ یہ خط انہی خطوط کی ایک کڑی ہے جب عمران خان کی حکومت تھی اور وزیر خزانہ شوکت ترین ملک کو ڈیفالٹ کروانے کی کوشش کر رہے تھے۔ ملک محمد احمد خان کا کہنا تھا کہ ماضی میں ان کی کوشش رہی کہ ملک ڈیفالٹ کر جائے، ان کا ایجنڈا پاکستان میں سیاسی عدم استحکام، عدالتوں میں تقسیم اور معاشی مشکلات پیدا کرنا تھا۔انہوں نے مزید کہا کہ آج کے حالات دیکھیں، عمر ایوب آئی ایم ایف کو خط لکھ رہے ہیں، اور وہ بانی پی ٹی آئی اور ان کے حواریوں کی حرکتوں پر پریشان ہیں کہ آخر ان کا ایجنڈا کیا ہے؟