عہد ساز انقلابی شاعر فیض احمد فیض کا آج یومِ پیدائش

لاہور( شوبز ڈیسک)عہد ساز انقلابی شاعر فیض احمد فیض کا آج یومِ پیدائش منایا جا رہا ہے۔فیض احمد فیض، جو کہ انسانی حقوق کے علمبردار اور اردو کے عظیم شاعر تھے، 13 فروری 1911 کو سیالکوٹ میں پیدا ہوئے۔ انہوں نے اپنی شاعری کے ذریعے ظلم، بے انصافی اور جبر و استبداد کے خلاف ساری زندگی جدوجہد کی۔ فیض احمد فیض کئی بار قید ہوئے اور جلا وطنی بھی برداشت کی، لیکن کبھی بھی حق گوئی سے پیچھے نہیں ہٹے۔فیض احمد فیض نے انقلابی فکر اور عاشقانہ لہجے کا ایسا حسین امتزاج پیش کیا کہ اردو شاعری میں ایک نئی جمالیاتی شان پیدا ہوئی۔ ان کی شاعری میں دل و دماغ دونوں کی بیزری کو پرکشش انداز میں پیش کیا گیا۔فیض احمد فیض کی فلم انڈسٹری کے لیے خدمات بھی ناقابل فراموش ہیں۔ ان کا کلام محمد رفیع، ملکہ ترنم نور جہاں، مہدی حسن، آشا بھوسلے اور جگجیت جیسے نامور گلوکاروں کی آوازوں میں ریکارڈ کیا گیا۔ انہوں نے درجنوں فلموں کے لیے غزلیں، گیت اور مکالمے بھی لکھے۔فیض احمد فیض نے اپنی شاعری کے ذریعے اردو زبان کو عالمی سطح پر سربلند کیا اور انہیں علمی و ادبی خدمات پر متعدد عالمی اور قومی اعزازات سے نوازا گیا۔ وہ واحد ایشیائی شاعر تھے جنہیں لینن پیس ایوارڈ سے نوازا گیا۔فیض احمد فیض نے ثابت کیا کہ حق گوئی کسی ایک شخص یا خطے کے لیے نہیں، بلکہ ہر زمانے اور خطے کے لیے ضروری ہے۔