کرم: اسلحے کی حوالگی پر اتفاق نہ ہو سکا

پشاور( اباسین خبر)کرم میں اسلحے کی حوالگی کے حوالے سے فریقین میں ابھی تک اتفاق نہیں ہو سکا ہے۔ دونوں فریقین نے اسلحہ جمع کرانے کے لیے الگ الگ طریقہ کار پیش کیے ہیں، جس پر حکومت غور کر رہی ہے۔ذرائع کے مطابق اگر فریقین کسی ایک طریقہ کار پر متفق نہ ہو پائے تو اس معاملے کو گرینڈ جرگے کے پاس لے جایا جائے گا، اور جو بھی فیصلہ گرینڈ جرگہ کرے گا، حکومت اس پر عمل درآمد کرے گی۔جرگہ ممبر فخر زمان کا کہنا ہے کہ اگر فریقین متفق نہ ہو سکے تو اسلحہ حوالگی کا معاملہ گرینڈ جرگے کو بھیجا جائے گا، جہاں فریقین کے نمائندے فیصلہ کریں گے اور حکومت اس فیصلے پر عمل کرے گی۔اس کے علاوہ، فخر زمان نے بگن بازار کے متاثرین کے لیے فوری معاوضے کی ادائیگی اور ان کی جلد آبادکاری کے لیے اقدامات اٹھانے کا مطالبہ بھی کیا ہے۔