کراچی کے کوٹے پر دیگر صوبوں کے 100 سے زائد طلبہ کو داخلے دیے گئے: ترجمان ایم کیو ایم

کراچی ( ایجو کیشن ڈیسک)متحدہ قومی موومنٹ (ایم کیو ایم) پاکستان کے ترجمان نے میڈیکل کالجز میں کراچی کے کوٹے پر اندرونِ سندھ، پنجاب اور دیگر صوبوں کے 100 سے زائد طلبہ کو داخلے دینے کی شدید مذمت کی ہے۔ ترجمان کے مطابق یہ اقدام ایک بار پھر کراچی کے طلبہ کے ساتھ کھلی زیادتی ہے۔ایم کیو ایم کے ترجمان نے کہا کہ کراچی کے طلبہ کے لیے مخصوص کوٹہ اندرونِ سندھ کو دینے کا منصوبہ بنایا جا رہا ہے، اور اس مقصد کے لیے جعلی ڈومیسائل بنانے کی کوششیں ہو رہی ہیں، خاص طور پر ضلع شرقی اور دیگر اضلاع میں۔ترجمان نے اس بات پر بھی تنقید کی کہ دیگر جامعات میں مقامی طلبہ کو ترجیحی بنیادوں پر داخلے دیے جاتے ہیں، مگر کراچی وہ واحد شہر ہے جہاں غیر مقامی طلبہ کو ترجیح دی جا رہی ہے۔ انہوں نے کہا کہ کراچی کا مستقبل پاکستان کا مستقبل ہے، اور سندھ کے متعصب حکمران اس کو تباہ کر رہے ہیں۔ایم کیو ایم نے مطالبہ کیا کہ چیف جسٹس کراچی کے طلبہ کے حقوق کے تحفظ کے لیے سو موٹو ایکشن لیں اور ان کو انصاف فراہم کریں۔