پاکستان مختلف مذاہب، ثقافتوں اور روایات کا حسین گلدستہ ہے:مریم نواز

لاہور( اباسین خبر)وزیراعلی پنجاب مریم نواز نے بین المذاہب ہم آہنگی کے عالمی ہفتے کے موقع پر اپنے پیغام میں کہا کہ پاکستان ہمیشہ سے مختلف مذاہب، ثقافتوں اور روایات کا حسین گلدستہ رہا ہے۔ ان کا کہنا تھا کہ پنجاب سب کا ہے اور یہاں ہر فرد کو بلا خوف اپنی عبادات ادا کرنے کی آزادی حاصل ہے۔ انہوں نے کہا کہ تمام مذاہب محبت، امن اور رواداری کا پیغام دیتے ہیں، جو حقیقی فلاحی معاشرے کی بنیاد ہے۔مریم نواز نے مزید کہا کہ “اختلافات ضرور ہوں، لیکن دین کی تعلیم اور تہذیب کا دامن نہیں چھوڑنا چاہیے۔ عقائد کا احترام اور ہم آہنگی کو فروغ دینا ہی پائیدار امن اور ترقی کی ضمانت ہے۔” انہوں نے یہ بھی کہا کہ پنجاب میں ہر شہری کو برابری کے حقوق حاصل ہیں اور یہاں اقلیتوں کے تحفظ کے لیے عملی اقدامات کیے جا رہے ہیں۔ان کا کہنا تھا کہ پنجاب حکومت قائداعظم کے افکار کی روشنی میں اقلیتوں کے حقوق کے تحفظ اور مساوی مواقع کی فراہمی کے لیے کام کر رہی ہے۔ انہوں نے بتایا کہ نادار اقلیتی افراد کو مینارٹی کارڈ کے ذریعے سہ ماہی مالی معاونت دی جا رہی ہے، جبکہ مندروں، گرجا گھروں اور دیگر عبادت گاہوں کی مرمت و بحالی کا عمل بھی جاری ہے۔مریم نواز نے یہ بھی کہا کہ اقلیتی برادری کے تہوار حکومت کی سطح پر منائے جا رہے ہیں اور اقلیتی فلاح و بہبود کے بجٹ میں خاطر خواہ اضافہ کیا گیا ہے۔ انہوں نے مزید کہا کہ اقلیتوں کے لیے تعلیم و روزگار کے مواقع بڑھائے جا رہے ہیں اور ہمیں محبت، بھائی چارے اور امن کا پیغام عام کرنا چاہیے تاکہ انتہا پسندی کے لیے کوئی جگہ نہ رہے۔