چیمپئنز ٹرافی سے قبل افغان فاسٹ بولر کا انٹرنیشنل کرکٹ سے ریٹائرمنٹ کا اعلان

کابل ( سپورٹس ڈیسک)افغانستان کرکٹ ٹیم کے بائیں ہاتھ کے فاسٹ بولر شاپور زادران نے 37 سال کی عمر میں انٹرنیشنل کرکٹ سے ریٹائرمنٹ کا اعلان کر دیا۔شاپور زادران نے 2009 میں افغانستان کے لیے اپنے کرکٹ کیریئر کا آغاز کیا اور جمعرات کو سوشل میڈیا پر اپنی ریٹائرمنٹ کا اعلان کیا۔ انہوں نے کہا کہ کرکٹ کو چھوڑنا ان کی زندگی کا سب سے مشکل فیصلہ تھا، کیونکہ ان کا کرکٹ سفر افغان کرکٹ کے انتہائی مشکل دور میں شروع ہوا تھا۔ شاپور نے اس دوران محدود وسائل اور متعدد رکاوٹوں کا سامنا کیا، مگر کبھی ہمت نہیں ہاری۔شاپور زادران نے شائقین کرکٹ، اپنے ساتھی کھلاڑیوں، کوچز اور خاص طور پر اپنے خاندان کی حمایت کا شکریہ ادا کیا جو ہمیشہ ان کے ساتھ رہی۔انہوں نے افغانستان کے لیے 44 ون ڈے اور 36 ٹی ٹوئنٹی میچز کھیل کر مجموعی طور پر 80 وکٹیں حاصل کیں۔ شاپور کا آخری میچ 2020 میں افغانستان کے لیے تھا، اور اب وہ کرکٹ کی دنیا کو خیرباد کہہ چکے ہیں۔