سردی کی لہر برقرار، مری میں برفباری، سیاحوں کی بڑی تعداد مال روڈ پر نکل آئی

اسلام آباد( اباسین خبر)ملک کے بیشتر علاقوں میں سردی کی لہر برقرار رہی جس کے باعث مختلف علاقوں میں موسم شدید سرد ہو گیا۔ مری میں برفباری کا سلسلہ جاری رہا، جس کی وجہ سے سیاحوں کی بڑی تعداد مال روڈ پر آ کر لطف اندوز ہوئی۔ گلیات میں بھی روئی کے گالوں جیسی برفباری ہوئی، جبکہ بلوچستان کے بیشتر اضلاع میں سرد موسم برقرار رہا۔مری کے علاوہ مختلف علاقوں میں درجہ حرارت منفی 9 ڈگری سینٹی گریڈ تک پہنچا۔ لیہ میں پارہ منفی 9، قلات میں منفی 8، گوپس میں منفی 7 اور کالام میں منفی 6 ڈگری سینٹی گریڈ ریکارڈ کیا گیا۔ سکردو میں منفی 5، کوئٹہ اور بگروٹ میں منفی 4، مالم جبہ، استور اور پارا چنار میں منفی 3 ڈگری سینٹی گریڈ تک درجہ حرارت رہا۔دوسری جانب بالائی خیبرپختونخوا کے مختلف علاقوں میں بادل برسنے کی نوید سنا دی گئی ہے اور گلگت بلتستان، کشمیر اور ملحقہ پہاڑی علاقوں میں بارش اور برفباری کی پیشگوئی کی گئی ہے۔