پنجاب کے میدانی علاقوں میں دھند کا راج، موٹروےبند، فلائٹ شیڈول بھی متاثر

لاہور ( اباسین خبر)لاہور سمیت پنجاب کے میدانی علاقوں میں دوبارہ دھند نے اپنی شدت دکھا دی ہے جس کے باعث حد نگاہ میں نمایاں کمی آئی ہے۔ اس صورتحال کی وجہ سے موٹروے کے مختلف حصوں کو بند کر دیا گیا ہے اور فلائٹ شیڈول بھی بری طرح متاثر ہو گیا ہے۔موٹروے پولیس کے ترجمان نے بتایا کہ شدید دھند کی وجہ سے متعدد موٹروے سیکشنز کو بند کر دیا گیا ہے۔ موٹروے ایم 3، جو فیض پور سے ننکانہ صاحب تک جاتی ہے، دھند کے باعث بند کر دی گئی ہے۔ لاہور سیالکوٹ موٹروے ایم 11 اور لاہور سے ہرن مینار تک موٹروے ایم 2 بھی حد نگاہ کم ہونے کی وجہ سے بند کر دیے گئے ہیں۔دھند کے اثرات ہوائی آپریشن پر بھی پڑے ہیں اور علامہ اقبال انٹرنیشنل ایئرپورٹ پر فلائٹ آپریشن متاثر ہو چکا ہے۔ ایوی ایشن ذرائع کے مطابق کراچی سے لاہور آنے والی نجی ایئر لائن کی پرواز 402 اور دبئی سے لاہور آنے والی پرواز 724 تاخیر کا شکار ہیں، جبکہ لاہور سے کراچی جانے والی نجی ایئر لائن کی پرواز 523 طیارے کی عدم دستیابی کے باعث اڑان نہیں بھر سکی۔