گلگت بلتستان اور آزاد کشمیر میں آئی ٹی پارکس کا قیام

گلگت ( مانیٹرنگ ڈیسک)اسپیشل کمیونیکیشن آرگنائزیشن (ایس سی او) نے آزاد کشمیر اور گلگت بلتستان میں مختلف آئی ٹی پارکس کا افتتاح کیا ہے۔ اس اقدام کا مقصد ان خطوں میں ڈیجیٹل ریوولوشن لانا اور نوجوانوں کو ٹیکنالوجی کے شعبے میں بااختیار بنانا ہے۔ ایس سی او کی کوشش ہے کہ کشمیر اور گلگت بلتستان کو ایک آئی ٹی سے آراستہ خطہ بنایا جائے۔تفصیلات کے مطابق، ایس سی او نے 16 ماہ کی ریکارڈ مدت میں دونوں خطوں میں 61 آئی ٹی پارکس اور فری لانسنگ ہبز قائم کیے ہیں۔ ان پارکس کا مقصد مقامی کمیونٹیز اور انتظامیہ کو ماحول دوست سسٹمز فراہم کرنا ہے، جبکہ فری لانسنگ ہبز نوجوانوں کو مہارتیں سیکھنے اور کامیابی کے مواقع فراہم کرکے انہیں بااختیار بناتے ہیں۔آزاد جموں و کشمیر میں 50 سافٹ ویئر ٹیکنالوجی پارکس اور فری لانسنگ ہبز قائم کیے جاچکے ہیں، جنہوں نے 6500 نوکریاں پیدا کیں اور 1600 فری لانسرز کو بااختیار بنایا ہے۔ ہر آئی ٹی پارک میں تیز رفتار انٹرنیٹ اور بلا تعطل بجلی کی فراہمی کی سہولت فراہم کی گئی ہے۔ ایس سی او معذور بچوں کے لیے بھی آزاد زندگی کے مراکز قائم کر رہا ہے تاکہ وہ تعلیم حاصل کر سکیں۔ اس کے علاوہ، ایس سی او نے خواتین کے لیے بھی فری لانسنگ ہبز قائم کیے ہیں تاکہ وہ محفوظ ماحول میں کام کر سکیں۔آرگنائزیشن کا اگلا ہدف گلگت بلتستان اور آزاد کشمیر میں مزید 100 آئی ٹی سیٹ اپس قائم کرنا ہے، جو 2025 تک اس خطے کو آئی ٹی کے مرکز میں تبدیل کرنے کے وژن کے تحت عمل میں لائے جائیں گے۔